مبدئيًا: بلاش \”دراسة حالة\” دي! ترجمة حرفية رخمة. سمّيها أي حاجة: رحلة مشروع، خلف الكواليس، قصة نجاح. حتى لو كتبتها زي ما هي \”كيس ستادي\”، أرحم.
الحكاية
من فترة، شفت وظيفة متاحة لصانع محتوى، ومن شروط القبول فيها تقديم كيس ستادي لشغل مشابه للمطلوب. وفي الكومنتات ناس سألت: \”عندنا بورتفوليو وخبرة أكتر من سنة، بس معندناش كيس ستادي، نعمل إيه؟\” والرد كان: ضروري كيس ستادي!
في المقال ده هتعرف:
- يعني إيه كيس ستادي، وفايدتها إيه.
- ليه بيطلبوها في التقديم على الوظايف.
- الشروط اللي من غيرها مش هتعرف تعملها.
- إزاي تعرضها في البورتفوليو، مع مثال عملي في ملف باوربوينت جاهز للتحميل.
يعني إيه كيس ستادي؟
ببساطة: مشروع اشتغلت عليه، لوحدك أو مع فريق، بتعرضه بتفاصيل أكتر من عرض الأعمال العادي، كإثبات لخبرتك وتعمقك في الشغل. وغالبًا بيتناقش في الإنترفيو.
أهميتها للمدير أو صاحب البيزنيس إنها بتجاوب على أسئلة مهمة بالنسبة له:
- إيه أسلوبك وطريقتك في الشغل؟
- ليه عملت اللي عملته ده؟
- فين النتايج والأرقام اللي حققتها؟
- لو عيّنت الشخص ده، هيحل مشاكلي ويزوّد أرباحي؟
الشروط: 3 أركان ماينفعش من غيرها
مش أي عمل ينفع يتعرض كقصة نجاح. لازم يجاوب على 3 أسئلة:
- المشكلة: إيه اللي كان بيواجه البيزنيس قبل الشغل ده؟
- الحل: إيه اللي عملناه، وليه اخترنا الحل ده؟ وإيه دوري أنا بالظبط؟
- النتايج: حققنا إيه؟ وإيه الفرق بين قبل وبعد؟
امسك أي عمل بتحبه وتعبت فيه، وخليه يجاوب على الأسئلة التلاتة دي. لو جاوب، يبقى عندك كيس ستادي.
إزاي تعرضها في البورتفوليو؟
الإجابة بتختلف حسب شكل البورتفوليو:
- ملف PDF أو كانڤا: هتحتاج 4 أو 5 صفحات في قسم منفصل وواضح. يُفضّل لونه يكون مختلف عن باقي الصفحات، عشان المتصفح يفهم إن الصفحات دي كلها بتحكي عن مشروع واحد.
- بورتفوليو أونلاين: اعمل القصة في صفحة منفصلة، شبه صفحات الهبوط. حط في البورتفوليو صورة أو زرار مكتوب عليه \”كيس ستادي\” ينقل للصفحة دي.
- على السوشيال ميديا: لينكدإن تحديدًا من أفضل المنصات لعرض الكيس ستاديز. هنا تقدر تحكيها براحتك كأنها قصة، ولما حد يطلب منك كيس ستادي، تبعتله لينك البوست. وممكن تحط اللينك ده جوه البورتفوليو كمان.
مثال عملي
خدت بوست حقيقي من مروة نصر، صاحبة منصة أون تراك، كانت بتحكي فيه عن مشروع اشتغلت عليه. والأركان التلاتة موجودة فيه بشكل بسيط وسلس:
- المشكلة: البيزنيس عنده سمعة وخبرة وثقة كبيرة عند جمهوره، لكن المبيعات مش على أد السمعة دي.
- الحل: إعادة تموضع البيزنيس (Repositioning) والتوعية بالبراند من خلال 5 حاجات: شكل البراند، والمحتوى، وتصوير المنتجات، وتطوير الموقع، والانتشار.
- النتايج: في 70 يوم بس: زيادة الوصول بنسبة تفوق 2000%، وأكتر من 650 عميل محتمل جديد، وزيادة المبيعات 14%.
وعشان أقرّب لك الصورة، حوّلت البوست ده لصفحات باوربوينت، تشوف منها شكل الكيس ستادي جوه البورتفوليو، وتعدّل عليها براحتك.
حمّل الملف من هنا: ملف الكيس ستادي (باوربوينت)
عايز تشوف نماذج حقيقية؟ حمّل كتيّب نماذج البورتفوليو المجاني: 15 بورتفوليو لصناع محتوى عرب وأجانب، مع تقييم لكل واحد.