من فترة، اتثار جدل كبير في مجال صناعة المحتوى حول فكرة الأعمال الوهمية أو الافتراضية داخل بورتفوليو المبتدئين. والآراء انقسمت بين فريق مؤيد ومشجّع، وفريق بيقول: \”أوباااا، اوعى تعمل كده يا معلم!\”
وأنا من الفريق التاني، بصراحة.
الأول: نتفق على المعنى
الأعمال الوهمية اللي أقصدها: إنت صانع محتوى مبتدئ، مشتغلتش شغل حقيقي قبل كده. فبتشوف بيزنيس أو شركة، وتكتب بوست أو إعلان شايفه أحلى وأقوى من محتواهم. أو بتتخيل شركة مش موجودة أصلًا، وتعمل لها خطة محتوى وقطع محتوى مقترحة.
الأعمال دي ممكن يكون شكلها جميل، وممكن تكون فعلًا أقوى من المنشور الحقيقي. بس في رأيي ضررها أكبر من نفعها، ودي الأسباب.
السبب الأول: الاسم نفسه بايخ!
يبان سبب تافه، لكنه من أقوى أسباب رفض البورتفوليو. أول ما العميل أو مسؤول التوظيف يشوف عنوان \”أعمال وهمية\” أو \”افتراضية\” أو \”غير رسمية\”، بتتكون في ذهنه صورة معينة، وبياخد قرار على أساسها.
وتخيل الموقف من ناحيته: وقته ضيق جدًا. دراسة شهيرة لموقع التوظيف Ladders، اتعملت بتتبع حركة العين، لقت إن مسؤول التوظيف بيقضي في المتوسط حوالي 7 ثواني بس في النظرة الأولى على السيرة الذاتية قبل ما يقرر يكمل ولا لأ. والبورتفوليو مش بعيد عن ده.
في ثواني زي دي، كلمة \”وهمي\” بتدي انطباع إن الأعمال مش حقيقية، ولم تُنشر، ومحدش راجعها. يعني حتى لو الأعمال قوية فعلًا، اسمها لوحده بيأثر على القرار.
فليه تحط نفسك في الموقف ده من الأول؟ ليه تتطوع وتقدم سبب رفض جاهز وطازة، وإنت عندك بدائل وحلول تانية؟
السبب التاني: دليل قاطع على قلة الخبرة
قسم الأعمال الوهمية دليل واضح على إنك مشتغلتش شغل حقيقي قبل كده، أو إن شغلك الحقيقي بسيط لا يُذكر.
يعني لو العميل ماخدش باله أصلًا، إنت بتنورله اللمبة، وتشاورله، وتقوله: \”بص، خلي بالك، أنا مشتغلتش شغل حقيقي قبل كده.\” ليه كده طيب؟
السبب التالت: الانفصال عن الواقع
ودي عشانك إنت، ولمصلحتك:
- ماتكسلش عن الشغل الحقيقي والتجارب. اخرج برة اللاب والموبايل واحتك بالواقع.
- وماتحبطش لو بقالك كتير بتقدم ومحدش بيرد عليك. الأسباب ممكن تكون كتير، لكن غالبًا الأعمال الوهمية اللي جوه البورتفوليو واحد منها.
طيب أعمل إيه؟ 3 بدائل أقوى
\”أنا صانع محتوى مبتدئ، معنديش أعمال سابقة، أو قليلة أوي. أملا البورتفوليو بإيه؟\”
1. شغل الكورس أو التدريب أو الإنترنشيب
مشاريع الكورس فكرة ممتازة تعرضها في البورتفوليو، وتكتب إنها مشاريع في الكورس الفلاني في المكان الفلاني. ولو الكورس قوي ومن مكان معروف في المجال، هيكون لها تأثير أقوى بكتير من مشروع كتبته مع نفسك ومحدش شافه.
وإنت في الكورس: اطلب من المحاضر فيدباك على أد ما تقدر. الفيدباك ده نفسه تقدر تعرضه كدليل على تطور شغلك. وممكن كمان تطلب منه يوصّلك بحد من علاقاته تعمل له شغل حقيقي، ولو تطوعي. ودي الفكرة التانية.
2. الشغل التطوعي
اتبرع بوقتك ومجهودك في مقابل إنك تطلع بشغل حقيقي. أمثلة:
- شركة شفت شغلها على الإنترنت: ابعتلهم قطعة محتوى كتبتها لصفحتهم، ولو ردوا، خليك جاهز بخطة أو شغل أكتر.
- بيزنيس والدك أو حد من قرايبك.
- محل العصير اللي جنب البيت، أو الچيم، أو مطعم فطير تحفة نفسك الناس تعرفه.
الشغل ده بعد ما يخلص هيبقى عندك منه نتايج، وحكايات، وتجارب حقيقية تعرضها في قسم الأعمال السابقة بطريقة ذكية.
3. الشغل الذاتي
دي أحلى فكرة بدل الشغل الوهمي. لو عندك مدونة، أو صفحة بتكتب فيها من وقت للتاني، أو جروب في موضوع بتحبه وبتعمل فيه محتوى بقالك فترة، اعرضهم في البورتفوليو.
بس بشرط: يكون فيها نتايج واضحة، زي عدد المشاهدات، أو التحميلات، أو المتابعين. النتايج دي هي اللي بتوضح لأي حد بيقرا البورتفوليو أد إيه إنت فاهم وشاطر في مجالك.
تنويه مهم
أنا مقتنع دايمًا بمبدأ: If it works, don\’t touch it.
يعني لو عندك بورتفوليو فيه أعمال وهمية، وجالك عن طريقه شغل، ومبسوط ومفيش مشاكل، فإنت تمام التمام، وسيبك من الكلام ده كله.
كلامي موجّه للي بيقدم على وظايف أو شغل فريلانس كتير من غير نتيجة ترضيه، وبيدور على حلول جديدة توصله لنتايج جديدة.
عايز تشوف نماذج حقيقية؟ حمّل كتيّب نماذج البورتفوليو المجاني: 15 بورتفوليو لصناع محتوى عرب وأجانب، مع تقييم لكل واحد.