ستة مصادر لنماذج البورتفوليو

المصدر 1

الفيس بوك

إنت غالبًا متابع 2-3 جروبات كبيرة بيهتموا بموضوع صناعة المحتوى .. هتدخل على الجروبات دي .. وتبحث بطريقتين

الطريقة الأولى: تروح عند تاب موجودة تحت صورة الكوڤر بتاعة الجروب اسمه Files أو ملفات .. تدوس عليه .. هايجيب لك كل الملفات البي دي إف الموجودة في الجروب .. لما تدوس على أي ملف فيهم .. هينقلك لصفحة البوست اللي كان جواه الملف ده .. معظم الملفات دي هتلاقيها إما سيڤيهات أو بورتفوليوز حقيقية لناس بتشتغل في وظايف مختلفة .. اختار اللي يناسبك .. واتفرج واستلهم

الطريقة الثانية: تعمل بحث جوة الجروب نفسه بالكلمات الآتية (بورتفوليو – portfolio – كاتب محتوى – كوبي رايتر – content writer – copywriter) وهيطلع لك جميع المنشورات اللي فيها إعلان وظايف أو حد بيعرض خدماته ودي اللي ممكن تلاقي فيها روابط لبورتفوليوز ماكنتش هتلاقيها في تاب الملفات اللي كان في الطريقة الأولى .. يعني أصحابها رافعين البورتفوليوز بتاعتهم على جوجل درايڤ أو أي موقع آخر .. مش رافعينها على الجروب مباشرة

—————–

المصدر 2

جوجل

لو عايز نتائج عامة .. هتكتب في بحث جوجل الوظيفة اللي انت قاصدها وجنبها كلمة بورتفوليو .. شوف بالعربي وبالانجليزي .. هيطلع لك نماذج كتير أغلبها صفحات بتناقش أصلا موضوع “نماذج البورتفوليو” و بيعرضوا من وجهة نظرهم أفضل الأمثلة لبورتفوليو .. اللي أغلبها بيكون بروتفوليو أونلاين .. يعني موقع شخصي أو منصة بتسمح بإنشاء بورتفولويوز عليها

أما لو عايز تشوف نماذج بورتفوليو بصيغة بي دي إف PDF .. هتعمل الحركة اللذيذة المشهورة بتاعة إنك تحدد لجوجل نوع الملف اللي انت عايز النتايج تطلع به .. زي كده بالظبط:

Content writer portfolio filetype:PDF

Copywriter portfolio filetype:PDF

هتلاقي نماذج حقيقية لصناع محتوى أغلبهم محترفين

—————–

المصدر 3

مواقع الفريلانس

سواء عربية زي خمسات أو مستقل أو الحريفة أو فريلانس يارد .. أو أجنبية زي فريلانسر و أب وورك .. تنشيء حساب لو مش عندك و تدخل المواقع دي وتعمل بحث عن الوظيفة المقصودة .. نتايج البحث مش هتديك فكرة عن التصميم والشكل .. لأن الشكل بيكون ثابت وموحد على حسب تصميم الموقع نفسه .. لكن هتقدر تاخد فكرة عامة عن “محتوى” البورتفوليوز اللي بتتعرض على المواقع دي .. يعني هتفيدك جدا لو عايز تعمل لنفسك حساب على أحد المواقع دي وتبدأ تبحث عن شغل فيهم .. وحتى لو عندك حساب بالفعل .. البحث عن النماذج ودراستها جيدًا .. يساعدك على التطوير وتقدر تخلق لنفسك مساحة متميزة عن كل اللي شفته .. إنت وشطارتك

—————–

المصدر 4

موقع لينكدإن LinkedIn

مصدر دسم وغزير بالنتائج .. وتقدر من خلال البحث عليه بالوظيفة تحصل على ملايين الحسابات كلها ملهمة لإنشاء أو تطوير البورتفوليو بتاعك .. الحسابات الشخصية لصناع المحتوى هناك – خاصة المحترفين منهم – تعتبر بورتفوليو في حد ذاتها .. ومن خلالها بيقدروا يسوقوا لخدماتهم و شغلهم بشكل فعال جدا .. وبطرق كتير مش هي موضوعنا دلوقتي .. المهم انك تتفرج على الحسابات بعين باحثة عن “نموذج البورتفوليو” .. هتفرق معاك كتير وانت بتبحث

—————–

المصدر 5

يوتيوب و تويتر (إكس حاليًا)

مصدرين مايقلوش أهمية عن اللي قبلهم .. مش بس في إمكانية وجود نماذج بورتفوليو مباشرة عليهم ولكن هتلاقي كمان أفكار كتير لطرق عرض الشغل خاصة على تويتر .. تلاقي صانع المحتوى من دول بيعرض خدمات أو إنجازات وفي آخر التويتة يسيب رابط للبورتفوليو بتاعه .. أما اليوتيوب عليه أفكار كتير حلوة جدًا ودروس خطوة بخطوة عن إنشاء أو تطوير البورتفوليو

—————–

المصدر 6

بيهانس – جرافيك ريڤر / إنڤاتو – فري پيك

مصادر استلهام أفكار للتصميم .. مش هتلاقي نماذج حقيقية .. لكن تقدر تشوف ملايين الأفكار لتصاميم بورتفوليوز معروضة على المواقع دي لأنها متخصصة في تصميم الجرافيكس .. لو كتبت بس في البحث هناك عندهم الوظيفة وجنبها كلمة بورتفوليو .. هتشوف أمثلة كتير .. وبيهانس تحديدًا ممكن تلاقي عليه بورتفوليوز حقيقية مش مجرد تمبلت تصميم .. بعض صناع المحتوى والكوبي رايترز بيعملوا البورتفوليو بتاعهم عليه .. ولو انها فكرة مش قوية أوي .. لكن هتديك أفكار عن شكل ومحتوى البورتفوليو عامة

—————–

المصدر السابع

كتيب نماذج البورتفوليو الموجود هنا على موقع البورتفوليو .. تقدر تحمّله وتتصفحه مجانًا وتتفرج على نماذج بورتفوليو حقيقية لصناع محتوى متميزين .. وأضفت فيه رأيي وملاحظات على النقاط الجيدة واقتراحات التطوير.