عدد المرات اللي حصلت فيها على وظيفة أو عمل بسبب إرسال البورتفوليو فقط = صفر تقريبًا!
الهدف من البورتفوليو في الأساس هو الحصول على الإنترڤيو .. مش الوظيفة .. وبعدها إما تنجح في الحصول على الوظيفة/العمل أو لأ ، ونجاحك ده بيتحدد بناء على توفيق ربنا لك أولًا وأخيرًا + مهارتك وخبرتك في اجتياز الإنترڤيو نفسه.
طيب إستفدت إيه أنا من المعلومة دي؟
إن من أهم عناصر البورتفوليو الناجح – في رأيي – هو “الخطفة” أو الهوك The Hook
الشخص المسؤول عن تلقي طلبات الوظيفة .. وبيقيّمها .. في الغالب بيشوف عشرات السي ڤيهات والبروتفوليوز في خلال ساعات معدودة ..
مهمتك وانت بتعمل البورتفوليو بتاعك إنك تشد .. تخطف .. تجبر الشخص ده على تذكرك .. ماينفعش ينساك وهو بيتصفح كل الكم ده من الطلبات .. مطلوب منك تخليه يحس إنك مختلف مش بس شاطر ..
عشان لما يشوف البورتفوليو بتاعك .. في خلال ثواني .. يتوقف عندك شوية.. ويقرا ويتصفح نسبة كبيرة من صفحات البورتفوليو بتاعك .. وبعدها يقرر يحفظ إسمك أو يكتبه على جنب لحد ما يشوف باقي الطلبات .. وبعد ما يخلص يروح نااااااازل تحت في آخر صفحة – غالبًا – ويشوف وسائل الاتصال بتاعتك عشان يقرر يكلمك أو يبعت لك رسالة ويقولك: مبروك! الطلب بتاعك اتوافق عليه ، ممكن تشرفنا الإنترڤيو يوم الأحد الجاي الساعة 4 العصر؟
وتضطر يوم الأحد تلبس فورمال و غالبًا هاتتفضح في شركتك الحالية .. وماحدش طيب وهايصدقّك وانت بتقولهم: عندي “مناسبة” بعد الشغل